السبت، 28 يونيو 2008

بحلم و يحلالي

بحلم ويحلالي ..بحلم وانا مالي ..اللي هيحصل ايه؟؟؟(محمد فؤاد)
كلنا بنحلم...والاحلام حرية
في منها بيتحقق..ومنها هيتحقق...ومنها مستحيل

اول ما قريت الاسئلة حسيت بصعوبتها
اولا بشكر فارس انه اهداني التاج وثانيا اتمنى ان اجاباتي متكونش تقيلة


(1)أذكر أحلاما تخص ماضيك كنت هتتخلى عن إيه فيها و هتتمسك بإيه لحد دلوقتى؟
زمان وانا صغيرة عمري ما تخيلت اني ادخل طب رغم اني كنت متفوقة في دراستي وكل اللي يعرفني قرايبي او جيراني مكنش بيقولي غير يا دكتورة من صغري
كان نفسي ادخل فنون جميلة وده اول حلم اتخليت عنه
بحب الرسم جدا وكنت غير الرسم بعمل حاجات يدوية لكن ما كبرت لقيت دماغي في سكة العلوم
دلوقتي طبعا بطلت رسم حتى محاولاتي اني ارجع مش حلوة حسيت ان ايدي تقلت
لحد اولى ثانوي كنت هدخل صيدلة لولا ان مجموعي جاب طب

حلمي دلوقتي اني اتخصص نسا وتوليد وده بناء على رغبات الجماهير

احلام مستحيلة:
- كان نفسي استمر على مستوايا الدراسي وابقى من الاوائل في الكلية عشان اتعين في الدمرداش لكن خلاص كله رااااااااح
بس الحمدلله كان طريقي هيبقى صعب اوي.
- بحلم دايما اني يكون عندي من الوقت اضعاف واضعاف عشان اعمل الحاجات اللي بحبها
لو كان عندي الوقت كنت درست تاريخ بلدي لاني بعشقه لانه تاريخ مشرف
وخصوصا حضارة مصر الاسلامية واثارها الرائعة
بجد الحضارة الاسلامية زي الامويين والعباسيين والفاطميين كلهم اثرو مصر بالادب والثقافة والاثار
لو كان عندي وقت كمان كنت كملت دراسة اللغة الفرنسية الي بعشقها من قلبي لاني درستها من اعدادي
_نفسي يكون عندي حاسة اعرف بيها راي اللي قدامي بصراحة لاني اتخدعت في ناس كتير بمعنى اصح نفسي يكون عندي فراسة


(2)اذكر أحلاما تخص مستقبلك و ما تتمناه منه
اني اقرب من ربنا اكتر
اني اتجوز انسان محترم يراعي ربنا فيا ,ويكون رومانسي لاني حساسة جدا
اني مبعدش عن اصحابي للي ارتبطت بيهم في الكلية ونفضل اصحاب على طول
نفسي اسافر فرنسا جدا
نفسي مصر تبقى احسن وكل شعبها يعيش مرتاح لان الشعب المصري شعب طيب وغلبان
نفسي تختفي اسرائيل من الخريطة العربية


(3)أذكر شخصين - على الأقل - متواجدين فى حياتك كنت تتمنى وجودهم من قبل
كل الشلة الفقر بتاعتي احنا 7 ودول اللي طلعت بيهم من الكلية
و اضيف عليهم فارس لانه من اقرب الناس ليا

(4)غير متواجدين فى حياتك و تتمنى وجودهم مستقبلا فى حياتك و حياة أولادك
اكيد زوج المستقبل واولادي ان شاء الله

واخيرا ارجو ان اجاباتي متكونش تقيلة واهدي التاج للي يدخل يقرا وميكونش جاوب قبل كده عليه

الجمعة، 27 يونيو 2008

الفانوس السحري



في يوم قررت اني (ادعبس) في (كراكيبي),,طبعا دي عادة المصريين كلهم

كل مصري له(كراكيبه) فوق الدولاب ,تحت السرير,في المكتب,المهم انه عنده (كراكيب)

وكلها مالهاش لازمة مجرد انه يحتفظ بالحاجات دي وميرميهاش.


وبعد دعبستي لقيت فانوس رمضان قديييييييييييييم من ايام الطفولة

يااااااااه اياااااااااااام,مسحت الفانوس وتخيلت نفسي ماسكة الفانوس السحري. يا سلااااااام


دعكت الفانوس زي الافلام العربي وتخيلت ان العفريت هيظهر شمهورش او مرجان ولا حتى عفروتو (حد لاقي)

ويقولي شبيكي لبيكي عبدك وبين ايديكي

تطلبي ايه؟؟؟

ياترى اطلب ايه اول حاجة؟


حطيت الفانوس قدامي وقعدت افكر(اعمل بيك ايه..؟)

وسمعت صوت ماما بتنده عليا(تعالي ساعديني)

قلتلها(حاضر بعمل حاجة وجاية)

بصيت للفانوس ...وكاني مصرة ان العفريت هيطلع ويسالني عن طلباتي

(وماله اما احضر الطلبات)


بصيت للمكتب لقيت تلال كتب الجراحة والنسا ..اتمنيت ان العفريت يطلع ويحرق الكتب

(لا لا خليها تنفع) وبعدين انا شارياها بفلوس

انا هقول للعفريت ينفخ النفخة التمام يخليني احفظ بيها الكتب دي عشان زهقت من المذاكرة

ياه لو في حاجة كده فعلا .


انت مش هتطلع بقى ولا ايه؟؟


ده اول طلب,,ايه تاني؟


يا سلام بقى لو عربية صغنونة كده واسميها زقزوقة اروح بيها الكلية وترحمني من زحمة المترو الغير ادمي

كده فاضلي طلب... مش بيجيبوا في الافلام 3طلبات

اكيد هطلب فلوس كتير, الزمن بقى وحش والاسعار ناااااار.


انا حضرت الطلبات ..يلا اطلع بقى


وهنا انتفضت مفزوعة على صوت عالي


لا لا لا


العفريت ماطلعش


ده صوت ماما ,, انا نسيتها تقريبا وغرقت في احلامي

الواحد ميعرفش يحلم شوية في البيت ده(حاضر انا جاية اهو)

بصيت للفانوس بصة اخيرة قبل ما ارجعه(تاني) للكراكيب

وقلت للعفريت الرزل اللي ماطلعش ممكن طلب رابع(زودتها معلش)

روح شوف ماما عايزة ايه واعمله!!!

الثلاثاء، 24 يونيو 2008

نرجسية


ترين نفسك شمساً تدور حولك كويكباتْ

تريدين أن نتسابق جميعاً لننال منك النفحاتْ

تظهرين قناعاً من نور ٍيخفي ما بك من صفاتْ

تتجملين بهذا الزيف لتكوني محط النظراتْ

عفواً فقد مللت غرورك ومللت حبك للذاتْ

ان كنتي ترين في مرآتك ملكة ومن حولك وصيفاتْ

فيكفيني أن أكون أميرة ولكن في نظر الأخرياتْ

السبت، 21 يونيو 2008

عيناك

عيناك قمر يضيء لي أظلم ليلاتي

عيناك رشدي وعصمتي من الزلات

دمعتك لؤلؤة تسكن أعمق الصدفات

جفنك المهد ترتاح عليه كل أناتي

نظرتك دربي وفي طريقي كالعلامات

بريقها نور يسطع فيملأ الظلمات

عيناك حياة حاضري وأمل الأت

الجمعة، 20 يونيو 2008

اصله معداش على مصر


ماشفش الامل في عيون الولاد وصبايا البلد

ولا شاف العمل سهران في البلاد والعزم اتولد

ولا شاف النيل في احضان الشجر

ولاسمع مواويل في ليالي القمر

اصله معداش على مصر .. يا حبيبتي يا مصر



الاغنية زيها زي غيرها من اغاني مصر اللي مش بنسمعها غير في المناسبات الوطنية او لما مصر تكسب في الكورة

لكن في مرة سمعتها بالصدفة ركزت في كلامها وغمضت عيني وسرحت معاهاعارفين شفت ايه؟؟؟


شفت الكورنيش وشفت النيل....شفت المراكب وشفت النخيل

واحد بينده : فسحة يا بيه..باتنين جنيه

بياع بطاطا وترمس ولب....وبنت سارحة بورد وفل

شفت الازهر والحسين...شميت روايح العطارين

الصاغة والفيشاوي..الغورية والخليلي

شفت الموسكي وزحمة العتبة والبياعين

لفيت في وسط البلد وعماد الدين

البرج والجزيرة والحناطير


في السيدة مدد يا ام هاشم ..والدنيا زحمة قدام المقام

وساعة الموالد تلقى الشوادر عند الميدان

في مصر القديمة كنايس جوامع حواري زمان

وجوه الحواري فيه مسحراتي نازل ينادي في ليل رمضان

وفي القهاوي مفيش كرسي فاضي طاولة وشيشة كله سهران

ضفاير البنات شقاوة الولاد

بياع عرقسوس في عز الحر ..مساح جزم في محطة مصر

واللي مشافش اللي انا شايفاه يبقى معداش على مصر


(ده مش شعر ).

فانا لا اجيد كتباته ولم يكن بنيتي ان اكتب هذه شعرا

واي وزن موجود فهو بالصدفة ليعطي الكلام تناسقا.

روند الجراحة.....خلص

كتير الواحد بيقابل ناس في حياته بيبقى سعيد انه اتعامل معاها حتى لومش هيتعامل معاها تاني..وكتير بننبهر ونعجب بيها
القصة دي حصلت معايا ,ممكن تكون حصلت مع ناس كتير, لكن في النهاية بيبقى مجرد شعور مؤقت وسرعان ما يختفي.......
انا
مع امتحان الروند كانت النهاية
يااااااااااااه شهرين عدوا بسرعة اوي (مش زعلانة عشان الروند طبعا) ده احنا ما بنصدق نخلص حاجة
انا زعلانة عشان مش هشوف دكتور .... كان دكتور جامد جدااااا(في الشرح والله) ده برضه ميمنعش انه عسول ودمه خفيف وجذاب و (مش متجوز) بصراحة كلنا حبناه .
كان بيجي يوم في الاسبوع وتلاقي اليوم ده كله بيحضر (ما شاء الله من امتى؟) جايين عشان (الشرح)طبعا, حتى اللي مش بيجي من الصبح بيجي على معاده مخصوص وبعد مايخلص شرح انا وانتيمتي نتكلم
انا:الشرح كان حلو اوي ,,انتيمتي: شرح ايه انا كنت متنحة ,,,انا:الروند كله متنح بس انا ركزت في الشرح(عاقلة وراسية) ونفضل نتكلم لحد ما نروح.
في يوم دخل كعادته بالبدلة(فظيعة طبعا) وقعد يشرح وقالنا ابقو احضرو يا جماعة عمليات عشان تفهمو احسن ,وهنا نورت (اللمبة)فوق دماغي وفيها ايه احضر عملية . بعد ما خلص شرح وبعد ما خلص طوابير الاسئلة (قال يعني مركزين) سالته على مواعيده في العمليات ابتسم ابتسامته الفظيعة ورحب اوي قاللي هتلاقي الجدول متعلق واسمي موجود في اليوم اللي هدخل فيه .
قررت اني احضر عملية لكن والله كنت سايباها لظروفها حسب ما اكون فاضية اي دكتور مش هتفرق(عقل) ويوم ما اتفقت مع زميلتي رحنا نشوف الجدول وكانت المفاجاة مستنياني ...اسمه (ياخراشي هو اللي داخل)طبعا كنت مزقططة وطايرة جوايا(عشان اغيظ انتيمتي كمان) (ايه الهبل ده انا رجعت مراهقة تاني) حضرت العملية وكانت فظيعة (عشان هو اللي عملها طبعا) طلع شاطر اوي .
وعدت الايام وهو يدخل ويشرح واحنا نتنح اكتر, ويوم ليلة الامتحان بيني وبين نفسي(ياترى همتحن عند مين) ايه ده هو انا ممكن ادخل امتحن عنده(بطلي هبل وركزي في المذاكرة).
يوم الامتحان كان موجود محطتش في دماغي كنت مركزة في المراجعة دخلنا وقالنا متخافوش وربنا معاكو.بعدها بدا الامتياز يندهو على الارقام وجه رقمي(لجنة دكتور....) لا لا لا كده كتيييير ايه الحظ ده همتحن معاه (قلبي) حمدت ربنا على الاقل عارفني وهيديني درجة حلوة سالني اسئلة حلوة وجاوبت معاه كويس ماعدا حاجة معرفتهاش قالي فكري(افكر ايه يا عم انا متنحة اساسا كفاية اني بجاوب عليك) قلتله عايزة سؤال بداله عشان اقفل اللجنة ,طبعا سالني وجاوبت ,,قاللي ممتازة( ممتازة!!!!! انا؟ قاللي ممتازة) قاللي اتفضلي(ايه ده بس كده ) انا عايزة تاني ,,مفيش حاجة تتطول القعدة شوية؟ افتكرت اني ممضتش حضور العملية معاه ,قلتله ممكن حضرتك تمضيلي؟ (وكاني بمضي اتوجراف من احمد السقا)ضحك وقاللي طبعا ممكن.
خرجت من عنده وكانت اول مرة ادخل امتحان ومش عايزة اخرج .طبعا كل الي امتحن عنده خارج بيتكلم(ياه فظيع,طيب,اسئلته حلوة,صوته ,ضحكته,,,, الخ)وتاني يوم كل اللي يشوفني عملتي ايه عند ..... كان حلو صح(خلاص يا جدعان مكنش امتحان).
خلص الامتحان وساعتها عرفت ان دي اخر مرة نشوفه الا اذا ضربت معايا زي ما ضربت المرتين اللي فاتو وامتحنت عنده اخر السنة او في امتياز بقيت في نفس الوحدة(احلااااااااام).
ايه المراهقة دي انا عيلت ولا ايه ...بلاش كلام فارغ روند وخلص ..خلاص.
ملاحظة:
كتبت القصة دي يوم 1/6
من كم يوم ظهرت نتيجة الامتحان ده لقيت الدكتور نقصني درجة !!! (خسارة فيك للي كتبته)

الخميس، 19 يونيو 2008

في الدمرداش

زي كل يوم وانا في طريقي ل (الروند) لازم اعدي واخد ال (اصطباحة) قدام مكان استلام الوفيات,,ستات لابسين اسود ,فارشين على رصيف المستشفى صويت وصريخ(عالصبح كده) اتعودت عالمنظر ده انه يكون اول حاجة اتصبح بيها في يومي ,ده غير العيانين اللي رايحين وجايين في الشارع اطفال وشباب وعواجيز (البلد كلها عيانة ولا ايه) ماعلينا وصلت البوابة ولازم زي كل يوم استنى شوية عشان اعرف ادخل على ما تخلص الخناقات بين الامن والعيانين ,كل ده عادي واتعودت عليه لكن اللي حصل بعدها اول مرة اشوفه عامل بيزق تروللي عليه (جثة) وقفت متنحة والناس وسعت الطريق ,رفعت صباعي بالشهادة,,كان اول مرة اشوف المنظر ده مسكت نفسي وكملت طريقي للروند,,طبعا متاخرة(مش كنت مستنية الخناقة تخلص) دخلت لقيت حالة (قرحة) اول مرة اشوفها(وياريتني ما شوفتها) كان راجل عجوز وحالته صعبة قربت عشان اشوف الحالة ,,كانت فظيعة(هو يوم باين من اوله)بعدها قررت ماشوفش الحالة دي تاني ,,دخل النائب بعد الشرح عشان ياخد العيان وقاله: يا حاج عايزين حد من ولادك عشان يديك دم
العيان: معنديش حد ,,النائب: فين ولادك محدش بيزورك ليه ؟,,العيان: والنبي يا دكتور خليني ساكت (وقعد يعيط) النائب:خلاص يا حاج انا اسف مش قصدي والله بس عشان نعملك العملية وكملو كلام لكني سرحت في حالة الراجل مريض ومحدش بيسال عليه(لا حول ولا قوة الا بالله)خرجت من الروند وانا لسة في الدور سمعت صوت خناقة(ايه يعني ده الطبيعي) لقيت واحدة ماسكة في خناق نائب: عملتو ايه في امي , حرام عليكو, لو مش عارفين تعالجوها قولو, امي مالها يا دكتور والنائب المسكين مش عارف يعملها ايه ويقولها ياستي هنطمنك لكن مفيش فايدة زودت في الكلام وقعدت تشده وهو بيحاول ينفد بجلده ومحدش خلصه منها غير الامن .
مشيت وانا بقول يارب اليوم ده يخلص ,جريت عشان اخرج من المستشفى قبل ما اشوف حاجة تاني(كفاية كده النهاردة) لكن هروح فين ده كل يوم بحكاية.