بحلم ويحلالي ..بحلم وانا مالي ..اللي هيحصل ايه؟؟؟(محمد فؤاد)
كلنا بنحلم...والاحلام حرية
في منها بيتحقق..ومنها هيتحقق...ومنها مستحيل
اول ما قريت الاسئلة حسيت بصعوبتها
اولا بشكر فارس انه اهداني التاج وثانيا اتمنى ان اجاباتي متكونش تقيلة
(1)أذكر أحلاما تخص ماضيك كنت هتتخلى عن إيه فيها و هتتمسك بإيه لحد دلوقتى؟
زمان وانا صغيرة عمري ما تخيلت اني ادخل طب رغم اني كنت متفوقة في دراستي وكل اللي يعرفني قرايبي او جيراني مكنش بيقولي غير يا دكتورة من صغري
كان نفسي ادخل فنون جميلة وده اول حلم اتخليت عنه
بحب الرسم جدا وكنت غير الرسم بعمل حاجات يدوية لكن ما كبرت لقيت دماغي في سكة العلوم
دلوقتي طبعا بطلت رسم حتى محاولاتي اني ارجع مش حلوة حسيت ان ايدي تقلت
لحد اولى ثانوي كنت هدخل صيدلة لولا ان مجموعي جاب طب
حلمي دلوقتي اني اتخصص نسا وتوليد وده بناء على رغبات الجماهير
احلام مستحيلة:
- كان نفسي استمر على مستوايا الدراسي وابقى من الاوائل في الكلية عشان اتعين في الدمرداش لكن خلاص كله رااااااااح
بس الحمدلله كان طريقي هيبقى صعب اوي.
- بحلم دايما اني يكون عندي من الوقت اضعاف واضعاف عشان اعمل الحاجات اللي بحبها
لو كان عندي الوقت كنت درست تاريخ بلدي لاني بعشقه لانه تاريخ مشرف
وخصوصا حضارة مصر الاسلامية واثارها الرائعة
بجد الحضارة الاسلامية زي الامويين والعباسيين والفاطميين كلهم اثرو مصر بالادب والثقافة والاثار
لو كان عندي وقت كمان كنت كملت دراسة اللغة الفرنسية الي بعشقها من قلبي لاني درستها من اعدادي
_نفسي يكون عندي حاسة اعرف بيها راي اللي قدامي بصراحة لاني اتخدعت في ناس كتير بمعنى اصح نفسي يكون عندي فراسة
(2)اذكر أحلاما تخص مستقبلك و ما تتمناه منه
اني اقرب من ربنا اكتر
اني اتجوز انسان محترم يراعي ربنا فيا ,ويكون رومانسي لاني حساسة جدا
اني مبعدش عن اصحابي للي ارتبطت بيهم في الكلية ونفضل اصحاب على طول
نفسي اسافر فرنسا جدا
نفسي مصر تبقى احسن وكل شعبها يعيش مرتاح لان الشعب المصري شعب طيب وغلبان
نفسي تختفي اسرائيل من الخريطة العربية
(3)أذكر شخصين - على الأقل - متواجدين فى حياتك كنت تتمنى وجودهم من قبل
كل الشلة الفقر بتاعتي احنا 7 ودول اللي طلعت بيهم من الكلية
و اضيف عليهم فارس لانه من اقرب الناس ليا
(4)غير متواجدين فى حياتك و تتمنى وجودهم مستقبلا فى حياتك و حياة أولادك
اكيد زوج المستقبل واولادي ان شاء الله
واخيرا ارجو ان اجاباتي متكونش تقيلة واهدي التاج للي يدخل يقرا وميكونش جاوب قبل كده عليه
الاشتراك في:
تعليقات الرسالة (Atom)
هناك 12 تعليقًا:
كلامك روعة .. وأحلامك روعة .. وأنتي أصلا روعة
ربنا يحقق كل أحلامك
انتي عارف أكيد أكتر جزء عجبني ايه (و اضيف عليهم فارس لانه من اقرب الناس ليا)
ميرسي بجد وأنتي أكيد عارفة معزتك عندي أد ايه
بالتوفيق دايما
ان شاء الله احلامك الجاية تتحقق يا بلو
يعين تبقي دكتورة نسا وتوليد وتعملي الدكتوراه بالفرنساوي في فرنساهههههههه
والاحلام المستحيلة انا شايفاها مش مستحيلة ولا حاجة , الكلية عوضيها بعد كدة في الماجستير ان شاء الله , والتاريخ لما تخلصي كدة وتبقي فاضية ابقي اقري في اوقات الفراغ
_نفسي يكون عندي حاسة اعرف بيها راي اللي قدامي بصراحة لاني اتخدعت في ناس كتير بمعنى اصح نفسي يكون عندي فراسة
--------
دي بقي هتيجي بالخبرة , وطول ماحنا عايشين في الدنيا بنتعلم وبنشوف
وبعدين هو لازم محمد فؤاد ينط في البلوج كمان :)
يارب تتحقق كل احلامك , وتحلمي كمان احلام جديدة
عزيزتى احلامنا كتتير بتتشابه وانا شايفه ان احلامك قريبه كتير من احلام فارس طبعا بلا ذكر ألة الزمن دى
بس اعتقد ان اجمل اطباء هما الاطباء اللي ليهم ميول فنيه هيكونوا رحماء بالمرضى , فعلا هيكونوا اطباء متميزين
بتمنالك التوفيق في حياتك وتحقيق احلامك
تحياتى
اجاباتك منطقيه صادقه اوي يا blue nile
بجد ربنا يكرمك ويحققلك كل احلامك
ليكوريكا
يعنى كسفتينى بكلامك الحلو ليا على الاجابات ودلوقتى مش عارفه اقولك ايه؟
بس انتى سكر خالص وربنا يحققلك احلامك مع انى حاسه من كلامك انها كانت بتتغير من فترة للتانيه ..بس مش مشكلة وبعدين ياحبيبتى مين فينا مااخدش على قفاه قبل كده واتخدع قبل كده..ربنا ياستى يعوضك خير وتبقى احسن دكتورة نسا فى مصر وبالمناسبة حد يقول برضه ان فارس غالى عليه؟؟
ده كلام؟؟.....ربنا يديم المعروف بينكوا يارب ..دمت بكل خير
اجاباتك جميله اوي وان شاءالله تحققي كل اللي بتتمنيه
لو كان عندي الوقت كنت درست تاريخ
رغبه جميله , انا علي فكره دارس تاريخ
نفسي يكون عندي حاسة اعرف بيها راي اللي قدامي بصراحة
انا برده كان نفسي في الامنيه دي وربما كان ليها اسباب تانيه
تحياتي
السلام عليكم ورحمة الله وبركاته
اجابات جميلة زى صاحبتها فعلا,وايه
كمان اكتشفت حاجات مشتركة بينى وبينك
مثلا ياستى انى عمرى ما تصورت انى اكون طبيبة (مع العلم ان هناك 2 من اخوتى يسبقوننى فى هذا المجال)
حب دراسة او القراءة فى التاريخ (بس بشرط عدم الاستمحان فيه ,ساعتها بيبقى بايخخخخخخخخخخخخخخخخخخخخ اوى ويسيح على بعضه والاقى قطز واقف مع مينا موحد القطرين ,ازاى ما عرفش؟
الفرنساوى درسته 3سنوات فى ثانوى ونجحت فيه وجبت 28 من 30 ايامهاولو تسالينى الان عنه ما اعرف الا مرسى بوكو!!!!!.اما ان نفسك تعرفى رأى الناس فيك فصدقينى انا خدى الناس على قدر عقولهم (ما تتعبيش نفسك)طول ما اللى امامك كويس خليك كويسه ,ولو قلب قولى له باباى ولا تتذكريه بعد ذلك.
طولت عليك معلش ,لكن من العشم يازميلة المهنة الجديدة.
وسلام يادكترة مثلما اعتاد احدهم ان يقول لىّ.
معلش اتاخرت في التعليق
طبعا احلامك جميلة اوي رقيقة و لسة بخيرها كدة ذي الندي علي ورقة ورد
ربنا يرزقك بعريس ابن حلال جميل جمال ان شالله حتي يكون له مثال و يارب انا كمان و كل البنات اللي لسة اللهم ما احفظنا ماتجوزوش :)
تحياتي
جميلة اوى اجاباتك بجد
وربنا يوفقك فى المجال اللى انتى اخترتيه لنفسك واتمنى ان تكونى مقتنعة به وان لا يكون بناءا على طلب الجماهير فقط
باين عليكى بتعشقى فرنسا
فى حفظ الله
ان شاء الله تحققي احلامك انا صيدلي وده كان حلم وخريج المعهد العالي للدراسات الاسلاميه وده حلم تاني ودلوقت شغال صيدلي وكمان في مجال الدعوه
السلام عليكم ورحمة الله وبركاته
اين انتِ ياطبيبة؟
فى النوبتشية؟
طيب
بس
حبيت
اقولك
ازيك.
سلام
ياطبيبة.
ربنا يحقق كل احلامك
كلها احلام متاحه وسهله وموضوعيه جدا
هى دى احلام الناس الطيبين
طريقه عرضك للاحلام روعه
وسردك جميل ومفرداتك ولا اجمل
تحياتى
إرسال تعليق