الأربعاء، 6 أغسطس 2008

اتنين X واحد

السلام عليكم ازيكو كلكو المدونة وحشتني بقالي اسبوع واكتر غايبة عنها

كان وصلني تاجين من فارس بلا جواد(مملكة الفرسان) ومهيج الجماهير واتاخرت جدا عليهم وياريت ميزعلوش مني
لان والله ظروفي كانت ملخبطة وعندي امتحانات وسافرت وقلت اول حاجة اعملها لما ارجع اجاوب عالتاج
انا بعتذر برضه عشان زيارتي للمدونات مش هتبقى منتظمة عشان عندي امتحانات واعتقد اني كمان مش هقدر انزل بوست جديد دلوقتي
ادعولي بس اعدي الامتحانات دي على خير

يلا نبدا الرغي ومحدش يزهق


6 اسرار لا يعرفها من يقابلك في المرة الاولى:

_ ممكن الناس تفتكرني جد وعشان في طب ابقى دحاحة ومش بعمل حاجة في حياتي غير المذاكرة وده غلط خالص

_ ممكن ابان هادية لكن انا مجنونة

_ طيبة جدا

مش لاقية اسرار تاني بصراحة


16 صفة عن نفسك:

1_ حساسة شوية والكلام بياثر فيا
2_ دمعتي قريبة جدا
3_ عبيطة حتى واحدة اتكلمت عالجروب بتاعنا ووصلني انها قالت عليا كده زعلت في الاول بس تقول عليا كده احسن ما تقول اني سوسة وخبيثة
4_ محبوبة والحمد لله من كل اللي يعرفني ودي نعمة من ربنا ربنا يديمها
5_ خدومة جدا وبحب اساعد اي حد اعرفه او معرفوش ومن نفسي مش لازم حد يطلب مني
6_ اصحابي بيحبو يتكلمو معايا وبيحسو بالراحة والحمد لله
7_ بحفظ الاسرار
8_ مبحبش ازعل حد مني ولو حصل بيبقى من غير قصد ومش بيجيلي نوم غير لما اطمن ان الحد ده مش زعلان
9_ بتعصب لما حد يستفزني ..بكره الاستفزاز
10_ بحب الضحك والهزار زي عينيا..وفي اوقات ببقى لاسعة عالاخر
11_ رومانسية جدا
12_ مبعرفش اخبي مشاعري وبيبان على وشي اي حاجة لو زعل او فرح وبيقولو ان وشي ده فضيحة
13_ساعة الجد ببقى جد ورخمة ود غالبا ساعة الامتحانات
14_بحب الناس وخصوصا اصحابي ووفية ومقدرش اتخيل حياتي من غيرهم
15_بعشق تربية الحيوانات جدا وربيت حاجات كتير وحاليا عندي 4 عصافير وسمكة وبموت فيهم
16_ اهلاوية وبعشق الاهلي

يارب مكونش رغاية وتبقى الصفة ال 17

اعتقد ان معظم الناس جاوبت عالتاج ده بجد مش عارفة مين مجاوبش بس اجرب اهديه ل:

حبيبة

COLD AIR

ليكوريكا

هناك 17 تعليقًا:

نـــــور يقول...

يااصباح الفل والجمال ياحبيبى
ازيك يارغايه ودى الصفة ال 17 ههههههه الحمد لله انك طمنتينى انك لسه عايشه اصلى والله قلقت عليكى وقلت البنت دى مش بتيجى تزورنى ليه؟
بس يلا الحمد لله انك بخير
اما بخصوص التاج فوالله انتى سكر وانا بحبك وخلاص
ميرسى على التاج وهو فعلا جالى وانا غايبه بس انا لسه مش جاوبت عليه
عموما هجاوبه قريب ان شاء الله
وحشتينى وماتغيبيش
دمت فى رعايه الله

خالد كامل يقول...

حمد الله على السلامة
كويس انك بخير
بالنسبة لاجابتك على التاج
انا فهمت انك تلقائية كدة و طيبة
شخصيتك جميلة فعلاً
و احنا مشتركين فى صفات مع بعض
تحياتى
سلام

Desert cat يقول...

حمد الله على سلامتك
انا كمان بحب اوى تربية العصافير والقطط
بس خلاص دلوقتى مش عندى عصافير لكن عندى لوجى قطتى حبيبتى
تحياتى

momken يقول...

جميله ردودك اوى

دمك خفيف
وردودك مقنعه وتملى الدماغ كده

تنفعى وزيره خارجيه
منتهى الدبلوماسيه

تحياتى

Bob يقول...

معظمها صفات مقبولة بس انا مختلف فعاكى فى اهم صفة وهى اخر صفة انك اهلاوية وانا فى الحقيقة زملكاوى عن ظهر قلب لكن مش مشكلة الاختلاف هو سر نجاح العلاقة بين المدونين

مش كدة هههههههههه
سلاااااااااااااااااااام

Bob يقول...

اة نسيت اقول
الحمد للة ان مش مين اللى مطلوب منهم الواجب
وشكرا

شهد الكلمات يقول...

الله قوام كدة
ده انا مالحقتش دا انا لسة بقول يا هادي لاقيتك خلصتي

انتي عارفة ان في صفات كتيرة من شخصيتك شبهي خالص

ربنا يوفقك في امتحناتك و ينجحك

تحياتي

Maha Shahen يقول...

طيب نقول حمدالله على سلامتك ولا هتوحشينا من غياب لغياب
بتمنالك ربنا يوفقك في الامتحانات يا رب وهندعيلك من كل قلوبنا انتى بس توكلى علي الله وشدى حيلك
صفاتك كلها جميله جدا وبالذات انك تحبى تربى حيوانات والعصافير يا سلام عليها
لما تبقوا اصحاب وتصحى علي زقزقتها وتأكليها انا جربت اربى عصافير لكن السمك المرحله الجايه بأذن الله
ترجعلنا بألف سلامه وهننتظرك بكل الشوق
وهننتظر اخبار حلوه عن الامتحانات
خدى بالك من نفسك
ربنا يحفظك من كل شر وبالتوفيق

Cold air يقول...

السلام عليكم

ازيك يا بلو و بجد ربنا معاك و يا رب تكوني ريلاكس بالذات في المراحل دي
و إن شاء الله متفوقة
أما بقي بالنسبة لإجاباتك فانا سعيد جدا بالتعرف عليك و علي شخصيتك أكثر و أكثر و حقيقي شخصيتك لذيذة و ناضجة في نفس الوقت
و بالنسبة للتاج اللي بعتيه ليا فأنا بشكرك علي الدعوة الرقيقة دي و بجد أنا أخدت الواجب ده قبل كده بس مش هزعلك و هحاول أحله هو و تاج كمان معايا قبل كده و أعمل زيك اتنين في واحد

مع خالص تحياتي و بالتوفيق يا بلو في الإمتحانات

الفارس الملثم يقول...

ربنا يعينك , وان شاء تكون الامتحانات كويسه ..

اجاباتك جميله اوي , وبتدل انك شخصيه جميله , ربنا يديم عليك محبة الاخرين ..

تحياتي دائما

Unknown يقول...

اولا اتمنى تكونى بخير
من اصعب الاشياء ان يجلس الشخص الى نفسة ويعدد صفاتة بكل موضوعية وحيادية سواء كانت سلبية او ايجابية واعتقد ان انسان يسهل علية ذلك فهناك من الصفات مالا نراها الا بأعين الاخرين
تحياتى

مدحت محمد يقول...

حلوة الاجابات

حلوة المدونة

احسن حاجة انك اهلاويههههههه

ليكوريكا يقول...

ربنا يقويكي في امتحاناتك

ويارب تجيبي امتياز وتطلعي كمان من لاوائل لو عاوزه

انا جاوبت الواجب خلاص :)

بس اكيد شكرا علي انك اهديتيهولي

بالتوفيق دايما ليكي ولكل اللي لسه بيمتحنوا

ليكوريكا

كوارث يقول...

اهم حاجه موضوع لاسعه عالآخر ده
اثبت عندك :P
لا بجد
ما شاء الله
شكلك عسل
تحيا مصر

نـــــور يقول...

بلو نايل بجد والله وحشتينى ومفتقداكى
وعلى فكره لما ترجعى لينا كلام مع بعض
مستنياكى
سلام موماتغيبيش
يارب تكون امتاحانك كويسه وتكونى بخير
دمت بخير

sweet-tweety يقول...

ايه التاج الجااااامد ده
قال وانا جايه اديكى تاااااااج ليكى وقلت هايبقى رخم وصعب لقيتك مخلصه الارخم منه
بس برده مليش دعوه ليكى عندى تااااااااج
لازم تعدى تاخديه

Blue Nile يقول...

ميرسي اوي لكل اللي علق على التاج
ميرسي لكلامكو الجميل ربنا يخليكو