اجازة

ازيكو عاملين ايه
وحشتوني بجد والمدونة وحشتني
بشكر كل اللي رد في الموضوع اللي فات
وبشكر كل اللي عيد عليا وكل اللي سال عليا بجد ميرسي جدا جدا

مش قادرة اقولكو الفترة اللي فاتت كانت صعبة ازاي واللي جاي اصعب
لاني بذاكر عشان امتحاناتي اخر نوفمبر ان شاء الله يعني كلها شهرين واتخرج وافضالكو

للاسف مفيش دماغ اقعد اكتب وادون لان صاحب بالين كداب
ياما هنزل بوست ميتقريش ياما مش هذاكر
عشان كده انا مضطرة اخد اجازة عقبال ما اخلص بس ربنا يسهل واقدر اتابعكو حتى

الفترة دي حاسة باحاسيس غريبة
فرحة عشان هخلص واتخرج وزعل عشان انا بحب الكلية
وحاجات تاني كتير هبقى اصدعكو بيها بعدين

عايزاكو تدعولي عشان انا ساعة الامتحانات ببقى قلق قلق يعني وعياط بقى وبهدلة(المفروض كبرت عالكلام ده بس مفيش فايدة)

انتظروني وان شاء الله اتابعكو
سلام

اسألكم الدعاء

انا لله وانا اليه راجعون

اسألكم الدعاء بالرحمة والمغفرة لوالد اقرب واعز صديقاتي الذي توفى في اول ايام العشر الاواخر وقد نوهت عنه صديقتي سنووايت.

غفر الله له واسكنه الله فسيح جناته

اسألكم الدعاء ايضا ان تتجاوز صديقتي هذه الفترة العصيبة لاننا نستعد للامتحانات
وادعو الله ان اكون انا وصديقاتي سندا لها حتى تتجاوز هذه الازمة

سوف ابتعد فترة لا يعلمها الا الله لسوء حالتي النفسية .

بداية جديدة

قد نمر بلحظات نشعر كانها لو نهاية العالم.....فراق حبيب , خيانة صديق , موت عزيز

انا لا اعتبر هذه قصة على قدر ما اعتبرها فكرة لنجعل من اي لحظة حزن بداية جديدة

بداية جديدة

______

غاب القمر عن سماء تلك الليلة الباردة, كانت تسير بخطوات سريعة تضم معطفها بقوة لتختبئ من تلك العاصفة التي رجفت بجسدها الضئيل وقلبها الجريح . تسقط عليها قطرات الامطار وتُسقط على الارض قطرات الدموع.

وصلت منزلها وخلعت معطفها الذي لم يحول عنها الشعور بالبرد, جلست تعيد احداث تلك الليلة المؤلمة والكلمات القاسية التي جرحتها...شعرت بالبرد مرة اخرى فأوقدت المدفأة.

احضرت صندوقا خشبيا , اخرجت منه صور واوراق ووردات ذابلة....لم تشعر بيدها وهي تلقي بهذه الاشياء بين حطب المدفأة.

لم تحتمل رؤية احتراق ذكرياتها والتي اصبحت رماد في لحظات..

القت بجسدها الهزيل على السريروشقت من الدموع انهارا على وسادتها, انهكها البكاء كثيرا حتى ذهبت في سبات عميق.

استقيظت على صوت آذان الفجر....نظرت الى المرآة وانزعجت لملامحها الذابلة ووجهها الشاحب وعينيها الحمراوتين . تألمت كثيرا لما فعلته في نفسها.

نظرت الي التقويم المعلق ونزعت ورقة الامس ...وقفت في النافذة تتأمل بصيص نور الشمس وتسمع صوت العصافير ...قطعت ورقة التقويم الي وريقات صغيرة وابتسمت وهي تراها تتطاير في الهواء.

"فلتكن هذه اللحظة بداية جديدة "

دعوة زفاف

عاد الي منزله بعد يوم شاق في العمل ووجد دعوة زفاف وصلته من صديقيه منذ ايام الجامعة.
وعلى الفور اتصل بصديقه لتهنئته ,تناول الدعوة مرة اخرى وقرأها حتى وصل لمكان قاعة الزفاف وصمت للحظات

"انها نفس القاعة التي تمت فيها خطبتي السابقة"

تذكر خطيبته التي كان يحبها بشدة وهي الاخرى ...استرجع شريط الذكريات منذ ان كانا اصدقاء في الجامعة الي المشكلة التي تسببت في انهاء ارتباطهما.
رفضا وساطة الاصدقاء في حل الخلاف وتمسك كلاهما برايه وكان العناد هو سيد الموقف رغم الحب الشديد.
شعر في تلك اللحظة بالحنين اليها فمازال حبها يملا قلبه واستبدل افكاره المليئة بالغيظ نحوها بشوق لرؤيتها.

جاء يوم زفاف صديقيه وذهب وهو يقدم قدم ويؤخر الاخرى ,دخل القاعة وجال بصره بالمكان
تذكر يوم خطبته ...هنا رقصا وهنا جلسا وهنا وهنا..... حتى رأى اصدقاءه جرى عليهم حتى يتخلص من تلك الافكار التي راودته وسلم عليهم سلاما حارا فلم يلتق بهم منذ وقت بعيد .

جلسوا يستعيدوا الذكريات وتعالت ضحكاتهم حتى صمت الجميع عندما وصلت صديقتهم وخطيبته السابقة,تقدمت بخطوات ثابتة وسلمت عليهم جميعا حتى هو.
نظر اليها في دهشة ممزوجة بالشغف ,كانت متالقة كعادتها,تفحص يدها ولكنه لم يجد ما يدل على ارتباطها.
كان احتمال قدومها لديه ضعيف ولكنه متوقع لانها صديقتهم مثله.وكان ثباتها رغم صعوبة الموقف مثيرا له ليتحدث اليها,قام الاصدقاء والتفو حول العروسين وتركوهما ليتحدثا.

سالها عن احوالها في محاولة لكسر حاجز الرهبة بينهما وكانت اجاباتها قصيرة ومختصرة.

"ما رايك في القاعة؟"

رفعت حاجبا وفهمت محاولته لاستفزازها للتحدث معه فاجابت بهدوء"انت تعلم رايي من قبل"

وهنا تجرا وسالها هل ارتبطت ام لا واجابته بالنفي"ولكنك ارتبطت"واشارت الي الدبلة التي يرتديها

قام بخلع الدبلة واعطاها اياها وتفاجئت عندما وجدتها دبلة خطبتهما فاسمها كان منقوش عليها"اما زلت تحتفظ بها؟؟؟" قالت في خجل...

"لم انساك ابدا"

وانطلقا في الحديث معا ودخلا في نقاش غير حاد فقد كان كل منهما يترقب رد الاخر ولا يريد اضاعة تلك الفرصة التي سنحت ليلتقيا بعد انفصالهما.

شعر داخله برغبة شديدة في العودة اليها ولكنه خاف من ردها, اخذ يفكر في القدر الذي جمعهما مرة اخرى هل كانت صدفة ام كان لاصدقائهما دور في ذلك.
لماذا جاء؟ هل فقط من اجل اصدقاءه ام لانه كان يعلم احتمالية قدومها؟

هي الاخرى فكرت في احتمالية وجوده ورغم ذلك جاءت وكانها تنتهز الفرصة لتراه وادركت في هذه اللحظات انها مازالت تحبه.
"لماذا صمتي؟فيم تفكرين؟" ولكنها اجابته بنظرة حائرة.

اخرج ميدالية مفاتيحه التي كان يعلق فيها دبلتها التي احتفظ بها ايضا وقال لها"ما رايك؟"

واحمرت وجنتاها في اجابة صريحة على طلبه.

شجرتان

دخلت شرفة حجرتي استنشق بعض النسمات الباردة

وقفت اتأمل تلك الشجرة التي غطت الشرفة تماماً وتذكرت...

تذكرت عندما زُرعت شجرة امام منزلي وأخرى امام منزلها

كنا اطفال صغار , لا نفترق ابدا.... نلعب ونلهو ونتحدث من الشرفات

لم يكن يعنيني وجود الشجرتين

كانتا صغيرتين مثلنا ..... الجذع قصير ونحيف , الفروع والاوراق قليلة , الازهار معدمة

مرت السنون وكبرنا....شغلتنا الحياة والدراسة

قليلاً ماكنا نتقابل

لم نكبر وحدنا , بل كبرتا معنا شجرتي وشجرتها

اشتد عودهما ,تفرعتا كثيراً ,كثفت اورقهما

اصبحنا بالكاد نرى بعضنا من بين الفروع

أما الآن.......

تشابكت افرع الشجرتين......تعانقتا

مثلما عانقتها يوم رحيلها

لقد رحلت جارتي لتبدأ حياة جديدة

لم أصدق في تلك اللحظة انني عندما ادخل شرفتي لن اراها

لن نتحدث من الشرفات بعد الآن

ولكني تأكدت عندما حاولت النظر الي شرفتها فلم ارى الا .......شجرتين.

نورٌعلى نورِ

بسم الله الرحمن الرحيم

{ اللَّهُ نُورُ السَّمَاوَاتِ وَالْأَرْضِ مَثَلُ نُورِهِ كَمِشْكَاةٍ فِيهَا مِصْبَاحٌ الْمِصْبَاحُ فِي زُجَاجَةٍ الزُّجَاجَةُ كَأَنَّهَا كَوْكَبٌ دُرِّيٌّ يُوقَدُ مِن شَجَرَةٍ مُّبَارَكَةٍ زَيْتُونِةٍ لَّا شَرْقِيَّةٍ وَلَا غَرْبِيَّةٍ يَكَادُ زَيْتُهَا يُضِيءُ وَلَوْ لَمْ تَمْسَسْهُ نَارٌ نُّورٌ عَلَى نُورٍ يَهْدِي اللَّهُ لِنُورِهِ مَن يَشَاء وَيَضْرِبُ اللَّهُ الْأَمْثَالَ لِلنَّاسِ وَاللَّهُ بِكُلِّ شَيْءٍ عَلِيمٌ }

صدق الله العظيم

اللهم اني اشكو اليك ضعف قوتي وقلة حيلتي وهواني على الناس

انت رب المستضعفين وانت ربي الى من تكلني

الى بعيد يتجهمني ام الى قريب ملكته امري

ان لم يكن بك غضب علي فلا ابالي ولكن عافيتك اوسع لي من ذنوبي

اسالك بنور وجهك الذي اشرقت له الظلمات وصلح عليه امر الدنيا والاخرة

من ان يحل بي سخطك او ينزل علي عذابك لك العتبى حتى ترضى ولاحول ولا قوة الا بك.

المقامة النملية

انا بعتذر عشان مكملتش الموضوع اللي فات وهكمله المرة الجاية ان شاء الله ,دي حاجة خفيفة كده اتمنى انها تعجبكو

المقامة النملية

________

عندما ياتي الصيف الحار , يشتد على منزلي الحصار , لعدو اسوأ من الفار , له قرون استشعار

يخرجون من الجحور الصغيرة , باعداد غفيرة

بحثا عن زاد للشتاء , فياله من بلاء

تخرج فرقة استطلاع , تبحث عن المتاع

على لقمة يتجمعون , ولما وجدوا يفرحون ,على حملها لا يقدرون , ومن ثقلها يتمايلون

يظنون انهم على وشك النجاح , لكني لهم واقفة بالسلاح

فابدتهم جميعا , ولكن هرب مني قليلا

اخبروا الملكة والملك , بان جيش الاستطلاع هلك

يطلبون المدد , وكثيرا من العدد

نظفت المنزل بالماء والصابون, لعلهم في جحورهم يغرقون

وبالمبيد والبودرة, هاجمتهم على غرة

وظننت انني نجحت ,وعليهم انتصرت, وفوق اشلائهم رقصت

فاذا بهم يتبخترون , للانتقام يزحفون ,على ذراعي و يقرصون

ووجدت طابورا طويلا, فبكيت منهم كثيرا , على جهد بلا فائدة ,امام الجحافل الصامدة

ورفعت الرايات,امام تلك الكائنات.

الحب .... واشياء اخرى

(1)

لماذا نحب؟؟؟؟

_______

لا شك ان الحب هو اسمى شعور يشعر به الانسان.

فالحب هو الغريزة الفطرية التي وضعها الله في الانسان بداية من حبنا للام والاب والاخوة الى حب الاهل والاصدقاء الى رحلة البحث عن الحب الاخر الذي تتجلى فيه مشاعرنا.

يقال ان الحب والعذاب وجهان لعملة واحدة ورغم ذلك لا يستطيع الانسان ان يعيش بدون حب , بل ويتلذذ من عذابه ويصر عليه .

مثال على ذلك الحب من طرف واحد, فهو يعلم ان الحب غير متبادل ورغم ذلك يحب.

ليس ذلك فقط فعلاقة الحب نفسها تحمل عذابا,عذاب الشوق والغيرة والانتظار والتفكير في الحبيب ولكن ذلك العذاب له طعم اخر.

ايضا عندما تنتهي علاقة حب تترك لصاحبها عذاب الفراق والم جرح الحبيب, وقد يصبح اسيرا لهذا الحب طيلة حياته ويعيش في عذاب الحب. ورغم ذلك لا نستطيع ان نكف عن الحب.

(2)

شعور اخر!!!

________

انه شعور اخر عندما يطرق الحب ابواب القلب.

يتغير سلوك الانسان كلية, يشعر انه خلق فقط من اجل الحبيب ,يسعى دائما لاسعاده وهو في نفس الوقت يشعر بالسعادة لرضاه.

يشعر لاول مرة بالامان, يصبح كائنا وديعا رقيقا تسيطر اللهفة على مشاعره.

تتغير فسيولوجيا الجسم مع تلك الحالة الجديدة , فقلبه لا يدق الا لرؤية الحبيب , تسرح العين فيه, يشرد الذهن ولا يفكر العقل الا من اجله.

يرى حياته وكانها بدات من جديد وانه ولد في اللحظة التي شعر فيها بهذا الدفئ.

يرى كل شيئ جميلا في عينيه , فهو حقا شعور اخر....

للحديث بقية...

اتنين X واحد

السلام عليكم ازيكو كلكو المدونة وحشتني بقالي اسبوع واكتر غايبة عنها

كان وصلني تاجين من فارس بلا جواد(مملكة الفرسان) ومهيج الجماهير واتاخرت جدا عليهم وياريت ميزعلوش مني
لان والله ظروفي كانت ملخبطة وعندي امتحانات وسافرت وقلت اول حاجة اعملها لما ارجع اجاوب عالتاج
انا بعتذر برضه عشان زيارتي للمدونات مش هتبقى منتظمة عشان عندي امتحانات واعتقد اني كمان مش هقدر انزل بوست جديد دلوقتي
ادعولي بس اعدي الامتحانات دي على خير

يلا نبدا الرغي ومحدش يزهق


6 اسرار لا يعرفها من يقابلك في المرة الاولى:

_ ممكن الناس تفتكرني جد وعشان في طب ابقى دحاحة ومش بعمل حاجة في حياتي غير المذاكرة وده غلط خالص

_ ممكن ابان هادية لكن انا مجنونة

_ طيبة جدا

مش لاقية اسرار تاني بصراحة


16 صفة عن نفسك:

1_ حساسة شوية والكلام بياثر فيا
2_ دمعتي قريبة جدا
3_ عبيطة حتى واحدة اتكلمت عالجروب بتاعنا ووصلني انها قالت عليا كده زعلت في الاول بس تقول عليا كده احسن ما تقول اني سوسة وخبيثة
4_ محبوبة والحمد لله من كل اللي يعرفني ودي نعمة من ربنا ربنا يديمها
5_ خدومة جدا وبحب اساعد اي حد اعرفه او معرفوش ومن نفسي مش لازم حد يطلب مني
6_ اصحابي بيحبو يتكلمو معايا وبيحسو بالراحة والحمد لله
7_ بحفظ الاسرار
8_ مبحبش ازعل حد مني ولو حصل بيبقى من غير قصد ومش بيجيلي نوم غير لما اطمن ان الحد ده مش زعلان
9_ بتعصب لما حد يستفزني ..بكره الاستفزاز
10_ بحب الضحك والهزار زي عينيا..وفي اوقات ببقى لاسعة عالاخر
11_ رومانسية جدا
12_ مبعرفش اخبي مشاعري وبيبان على وشي اي حاجة لو زعل او فرح وبيقولو ان وشي ده فضيحة
13_ساعة الجد ببقى جد ورخمة ود غالبا ساعة الامتحانات
14_بحب الناس وخصوصا اصحابي ووفية ومقدرش اتخيل حياتي من غيرهم
15_بعشق تربية الحيوانات جدا وربيت حاجات كتير وحاليا عندي 4 عصافير وسمكة وبموت فيهم
16_ اهلاوية وبعشق الاهلي

يارب مكونش رغاية وتبقى الصفة ال 17

اعتقد ان معظم الناس جاوبت عالتاج ده بجد مش عارفة مين مجاوبش بس اجرب اهديه ل:

حبيبة

COLD AIR

ليكوريكا

رسالة لن ترسل

دقت الساعة الثامنة مساءا ً ,ذلك الوقت المتفق عليه ان يكون موعداً ثابتاً لإتصالهما
امسكت هاتفها وتمددت بإسترخاء منتظرة الإتصال
مرت الدقائق ولم يتصل بها

"انها اول مرة يتاخر فيها عن موعدنا سأحاول الاتصال به"
ولكن لم تفلح محاولتها ....ازدادت قلقاً وحيرة في الأمر
تلك هي المرة الاولى التي لا يتصل بها منذ أن سافر خطيبها للخارج بحثاً عن عمل لبناء بيت الزوجية.

تلمست خاتم الخطبة برقة, وأدمعت عينها لقلقها عليه ولإحتياجها للتحدث معه فهي لا تستطيع ان يمر يوم ٌ دون أن تتحدث إليه وتحكي له كيف قضت يومها وتخبره بالأشياء التي تعدها لمنزل المستقبل.
تذكرت لحظة وداعهما حين سفره وانهمرت في البكاء وتمنت لو لم يسافر حتى لاتشعر بما تشعر به الأن من قلق وخوف.
أحضرت حافظتها الشخصية وأخرجت منها صورته التي تحتفظ بها" أفتقد ملامحك الرقيقة" هكذا قالت بعد أن طبعت قبلة حانية على الصورة.
نظرت الي الساعة مرة أخرى وحاولت الإتصال ثانية ولكن دون جدوى"ماذا بك يا حبيبي اشتقت الي صوتك الدافئ"
زاد انشغالها عليه فقررت ان تكتب رسالة تشغلها عن التفكير والقلق ,تتحدث فيها اليه وتقرأها له عند اتصاله
اعدت فنجاناً من الشاي ووضعت صورته امامها وأمسكت القلم بيد ِ مرتعشة وكتبت:

شهور مرت دون أن أراك..لم تغب ملامحك عني, أفتقد لمستك الدافئة, أستنشق رحيق ورداتك كل صباح
أجلس بين هداياك الرقيقة أمام صورتك

أنتظرلحظة اتصالك وانتظر بعدها لحظة عودتك لنبدأ حياتنا التي طالما حلمنا بها.

دقت الساعة التاسعة, كانت دقاتها مزعجة كطبول حرب تنذر بشيئ ما.أزعجتها لدرجة ان انسكب فنجان الشاي على رسالتها ومُحيت كل كلماتها.
ومع تلك الدقات جاء رنين الهاتف,أسرعت وتناولته ,لم يكن رقمه
ولكن كان رقماً يحمل نفس كود البلد التي سافر إليها.
شعرت بالخوف وأجابت بصوت خافت متقطع ,وقبل إنتهاءالمحادثة هوت كطير جريح أصيب بسهام غادرة

وكأن قدر الرسالة التي كتبتها أنها لن ترسل.

فــــــصــــــــول

شتاء

اخشى على قلبي برد الشتاء

يختبأ كما القمر خلف الغيوم في ليلة قارسة

في انتظار هطول امطار الحب وسطوع شمسه الرقيقة

فتغمر قلبي بالدفئ والامان

ولكني اعلم ضعف قلبي وعجزه في الصمود امام رياح الحب الغادرة

ربيع

تفتح قلبي

اشعر بنسمات الحب تداعبه مداعبة نسيم الصباح للورود

اشعر بربيع قلبي وحيويته

لكني لازلت ابتعد...كفراشة تهرب من ايد عابثة

صيف

حرارة حارقة

هي حرارة قلبي الان

فقد وصل لذروة الاشتياق للحب

ولكن لما التهور والاندفاع؟

فالصيف جنون

واخشى على قلبي الاحتراق

خريف

ذبلت اوراق قلبي ,,,وظهرت شيخوخته

تمر امامي الذكريات

كعاصفة تنثر اوراق شجر صفراء

الان افضل السكون

افكر....

هل استمر في الفرار...ام اطلق لقلبي العنان
هل استمر في خوفي واحكامي على قلبي....ام اطلقه حرا

ساترك الاجابة لفصل جديد....

ابيات من اهداء فارس بلا جواد:

شتاءٌ طالت أيامه

يبحث عن دفء بأعماقي

والصيف حرارته شديدة

وأشد منها أشواقي

وربيعٌ غابت أزهاره

لم أظفر منها بتلاقِ

وخريفٌ رحل فلم يترك

سوي دمع حبيس الأحداقِ

بشكر فارس طبعا على الابيات

نظرات غير متبادلة

كنت على الشاطئ كعادتي ساعة الغروب ,حين يبدأ الناس في الإنصراف ولا يتبق منهم إلا قليل يفضلون تلك الساعة مثلي.
جلست بمفردي أتأمل الأفق ,وإلتحام السماء مع البحر وآشعة الشمس الذهبية مندمجة بينهما.
لا شيئ يثير إهتمامي سوى ذلك المشهد.
لمحت فتاة تجلس قريبا ًمن البحر ,كانت بمفردها مثلي, ويبدو عليها الإهتمام بالغروب أيضا ً,
وجدت في عينيها حزنا ً غريبا ً ولكنه زادها جمالا ً.
تركت الغروب الذي أفضله وتابعتها بشغف.
كانت تحرك الرمال بقدميها الصغيرتين فينساب من بين أصابعها في حركة أثارت البحر فأرسل موجة رقيقة مداعبة أزالت عنها الرمال.
لقد تركت الغروب تماما ً فالفضول تملكني في معرفة سبب حزن عينيها العسليتين والذي جعلها تتحاشى النظر حولها.
نظرت اليها مرارا ً حتى ألفت نظرها إلى أن بادلتني نظرة على استحياء شديد أثارت فضولي أكثر وأكثر.
لقد قاربت الشمس على الرحيل والشفق ملأ السماء وعكس على وجهها حمرة ً اضفت عليها سحرا ً.
لحظات ووجدتها تغيب مع مغيب الشمس ,عندما تعلقت بذراع إمرأة تبدو من نفس نظرة الحزن إياها أنها والدتها.
فقد غمرتها بعطف وأسندتها ورحلتا.
أدركت في هذه اللحظة سبب حزن عينيها,إنها لا ترى إلا الظلام .
وأدركت ايضا ً انها لم تبادلني النظرات.

مشاعر متباينة

مازال الطفلان الصغيران ساكنين بداخلنا

نلهو كثيرا

نضحك كثيرا

ايضا نتشاجر كما يتشاجر الاطفال على دمية

ولكننا نعرف جيدا قواعد اللعبة

نشد احيانا ونرخي كثيرا حتى لا تتحطم.





نشعر بالانطلاق كالشباب

نختلس لحظات السعادة

نتبادل الحب

تملأنا نشوة الحاضر وامل المستقبل.

ولكن....

كثيرا ما يصيبنا الملل

نصمت ككهلين

تراكمت عليهما هموم واحزان الزمان

يصيبنا الضعف

يحتاج كلانا ان يستمد القوة من الاخر

نسترجع الذكريات الجميلة

فسرعان ما نتغلب على تلك الشيخوخة.

بحلم و يحلالي

بحلم ويحلالي ..بحلم وانا مالي ..اللي هيحصل ايه؟؟؟(محمد فؤاد)
كلنا بنحلم...والاحلام حرية
في منها بيتحقق..ومنها هيتحقق...ومنها مستحيل

اول ما قريت الاسئلة حسيت بصعوبتها
اولا بشكر فارس انه اهداني التاج وثانيا اتمنى ان اجاباتي متكونش تقيلة


(1)أذكر أحلاما تخص ماضيك كنت هتتخلى عن إيه فيها و هتتمسك بإيه لحد دلوقتى؟
زمان وانا صغيرة عمري ما تخيلت اني ادخل طب رغم اني كنت متفوقة في دراستي وكل اللي يعرفني قرايبي او جيراني مكنش بيقولي غير يا دكتورة من صغري
كان نفسي ادخل فنون جميلة وده اول حلم اتخليت عنه
بحب الرسم جدا وكنت غير الرسم بعمل حاجات يدوية لكن ما كبرت لقيت دماغي في سكة العلوم
دلوقتي طبعا بطلت رسم حتى محاولاتي اني ارجع مش حلوة حسيت ان ايدي تقلت
لحد اولى ثانوي كنت هدخل صيدلة لولا ان مجموعي جاب طب

حلمي دلوقتي اني اتخصص نسا وتوليد وده بناء على رغبات الجماهير

احلام مستحيلة:
- كان نفسي استمر على مستوايا الدراسي وابقى من الاوائل في الكلية عشان اتعين في الدمرداش لكن خلاص كله رااااااااح
بس الحمدلله كان طريقي هيبقى صعب اوي.
- بحلم دايما اني يكون عندي من الوقت اضعاف واضعاف عشان اعمل الحاجات اللي بحبها
لو كان عندي الوقت كنت درست تاريخ بلدي لاني بعشقه لانه تاريخ مشرف
وخصوصا حضارة مصر الاسلامية واثارها الرائعة
بجد الحضارة الاسلامية زي الامويين والعباسيين والفاطميين كلهم اثرو مصر بالادب والثقافة والاثار
لو كان عندي وقت كمان كنت كملت دراسة اللغة الفرنسية الي بعشقها من قلبي لاني درستها من اعدادي
_نفسي يكون عندي حاسة اعرف بيها راي اللي قدامي بصراحة لاني اتخدعت في ناس كتير بمعنى اصح نفسي يكون عندي فراسة


(2)اذكر أحلاما تخص مستقبلك و ما تتمناه منه
اني اقرب من ربنا اكتر
اني اتجوز انسان محترم يراعي ربنا فيا ,ويكون رومانسي لاني حساسة جدا
اني مبعدش عن اصحابي للي ارتبطت بيهم في الكلية ونفضل اصحاب على طول
نفسي اسافر فرنسا جدا
نفسي مصر تبقى احسن وكل شعبها يعيش مرتاح لان الشعب المصري شعب طيب وغلبان
نفسي تختفي اسرائيل من الخريطة العربية


(3)أذكر شخصين - على الأقل - متواجدين فى حياتك كنت تتمنى وجودهم من قبل
كل الشلة الفقر بتاعتي احنا 7 ودول اللي طلعت بيهم من الكلية
و اضيف عليهم فارس لانه من اقرب الناس ليا

(4)غير متواجدين فى حياتك و تتمنى وجودهم مستقبلا فى حياتك و حياة أولادك
اكيد زوج المستقبل واولادي ان شاء الله

واخيرا ارجو ان اجاباتي متكونش تقيلة واهدي التاج للي يدخل يقرا وميكونش جاوب قبل كده عليه

الفانوس السحري

في يوم قررت اني (ادعبس) في (كراكيبي),,طبعا دي عادة المصريين كلهم

كل مصري له(كراكيبه) فوق الدولاب ,تحت السرير,في المكتب,المهم انه عنده (كراكيب)

وكلها مالهاش لازمة مجرد انه يحتفظ بالحاجات دي وميرميهاش.

وبعد دعبستي لقيت فانوس رمضان قديييييييييييييم من ايام الطفولة

يااااااااه اياااااااااااام,مسحت الفانوس وتخيلت نفسي ماسكة الفانوس السحري. يا سلااااااام

دعكت الفانوس زي الافلام العربي وتخيلت ان العفريت هيظهر شمهورش او مرجان ولا حتى عفروتو (حد لاقي)

ويقولي شبيكي لبيكي عبدك وبين ايديكي

تطلبي ايه؟؟؟

ياترى اطلب ايه اول حاجة؟

حطيت الفانوس قدامي وقعدت افكر(اعمل بيك ايه..؟)

وسمعت صوت ماما بتنده عليا(تعالي ساعديني)

قلتلها(حاضر بعمل حاجة وجاية)

بصيت للفانوس ...وكاني مصرة ان العفريت هيطلع ويسالني عن طلباتي

(وماله اما احضر الطلبات)

بصيت للمكتب لقيت تلال كتب الجراحة والنسا ..اتمنيت ان العفريت يطلع ويحرق الكتب

(لا لا خليها تنفع) وبعدين انا شارياها بفلوس

انا هقول للعفريت ينفخ النفخة التمام يخليني احفظ بيها الكتب دي عشان زهقت من المذاكرة

ياه لو في حاجة كده فعلا .

انت مش هتطلع بقى ولا ايه؟؟

ده اول طلب,,ايه تاني؟

يا سلام بقى لو عربية صغنونة كده واسميها زقزوقة اروح بيها الكلية وترحمني من زحمة المترو الغير ادمي

كده فاضلي طلب... مش بيجيبوا في الافلام 3طلبات

اكيد هطلب فلوس كتير, الزمن بقى وحش والاسعار ناااااار.

انا حضرت الطلبات ..يلا اطلع بقى

وهنا انتفضت مفزوعة على صوت عالي

لا لا لا

العفريت ماطلعش

ده صوت ماما ,, انا نسيتها تقريبا وغرقت في احلامي

الواحد ميعرفش يحلم شوية في البيت ده(حاضر انا جاية اهو)

بصيت للفانوس بصة اخيرة قبل ما ارجعه(تاني) للكراكيب

وقلت للعفريت الرزل اللي ماطلعش ممكن طلب رابع(زودتها معلش)

روح شوف ماما عايزة ايه واعمله!!!

نرجسية

ترين نفسك شمساً تدور حولك كويكباتْ

تريدين أن نتسابق جميعاً لننال منك النفحاتْ

تظهرين قناعاً من نور ٍيخفي ما بك من صفاتْ

تتجملين بهذا الزيف لتكوني محط النظراتْ

عفواً فقد مللت غرورك ومللت حبك للذاتْ

ان كنتي ترين في مرآتك ملكة ومن حولك وصيفاتْ

فيكفيني أن أكون أميرة ولكن في نظر الأخرياتْ

عيناك

عيناك قمر يضيء لي أظلم ليلاتي

عيناك رشدي وعصمتي من الزلات

دمعتك لؤلؤة تسكن أعمق الصدفات

جفنك المهد ترتاح عليه كل أناتي

نظرتك دربي وفي طريقي كالعلامات

بريقها نور يسطع فيملأ الظلمات

عيناك حياة حاضري وأمل الأت

اصله معداش على مصر

ماشفش الامل في عيون الولاد وصبايا البلد

ولا شاف العمل سهران في البلاد والعزم اتولد

ولا شاف النيل في احضان الشجر

ولاسمع مواويل في ليالي القمر

اصله معداش على مصر .. يا حبيبتي يا مصر

الاغنية زيها زي غيرها من اغاني مصر اللي مش بنسمعها غير في المناسبات الوطنية او لما مصر تكسب في الكورة

لكن في مرة سمعتها بالصدفة ركزت في كلامها وغمضت عيني وسرحت معاهاعارفين شفت ايه؟؟؟

شفت الكورنيش وشفت النيل....شفت المراكب وشفت النخيل

واحد بينده : فسحة يا بيه..باتنين جنيه

بياع بطاطا وترمس ولب....وبنت سارحة بورد وفل

شفت الازهر والحسين...شميت روايح العطارين

الصاغة والفيشاوي..الغورية والخليلي

شفت الموسكي وزحمة العتبة والبياعين

لفيت في وسط البلد وعماد الدين

البرج والجزيرة والحناطير

في السيدة مدد يا ام هاشم ..والدنيا زحمة قدام المقام

وساعة الموالد تلقى الشوادر عند الميدان

في مصر القديمة كنايس جوامع حواري زمان

وجوه الحواري فيه مسحراتي نازل ينادي في ليل رمضان

وفي القهاوي مفيش كرسي فاضي طاولة وشيشة كله سهران

ضفاير البنات شقاوة الولاد

بياع عرقسوس في عز الحر ..مساح جزم في محطة مصر

واللي مشافش اللي انا شايفاه يبقى معداش على مصر

(ده مش شعر ).

فانا لا اجيد كتباته ولم يكن بنيتي ان اكتب هذه شعرا

واي وزن موجود فهو بالصدفة ليعطي الكلام تناسقا.

روند الجراحة.....خلص

كتير الواحد بيقابل ناس في حياته بيبقى سعيد انه اتعامل معاها حتى لومش هيتعامل معاها تاني..وكتير بننبهر ونعجب بيها

القصة دي حصلت معايا ,ممكن تكون حصلت مع ناس كتير, لكن في النهاية بيبقى مجرد شعور مؤقت وسرعان ما يختفي.......

انا

مع امتحان الروند كانت النهاية

يااااااااااااه شهرين عدوا بسرعة اوي (مش زعلانة عشان الروند طبعا) ده احنا ما بنصدق نخلص حاجة

انا زعلانة عشان مش هشوف دكتور .... كان دكتور جامد جدااااا(في الشرح والله) ده برضه ميمنعش انه عسول ودمه خفيف وجذاب و (مش متجوز) بصراحة كلنا حبناه .

كان بيجي يوم في الاسبوع وتلاقي اليوم ده كله بيحضر (ما شاء الله من امتى؟) جايين عشان (الشرح)طبعا, حتى اللي مش بيجي من الصبح بيجي على معاده مخصوص وبعد مايخلص شرح انا وانتيمتي نتكلم

انا:الشرح كان حلو اوي ,,انتيمتي: شرح ايه انا كنت متنحة ,,,انا:الروند كله متنح بس انا ركزت في الشرح(عاقلة وراسية) ونفضل نتكلم لحد ما نروح.

في يوم دخل كعادته بالبدلة(فظيعة طبعا) وقعد يشرح وقالنا ابقو احضرو يا جماعة عمليات عشان تفهمو احسن ,وهنا نورت (اللمبة)فوق دماغي وفيها ايه احضر عملية . بعد ما خلص شرح وبعد ما خلص طوابير الاسئلة (قال يعني مركزين) سالته على مواعيده في العمليات ابتسم ابتسامته الفظيعة ورحب اوي قاللي هتلاقي الجدول متعلق واسمي موجود في اليوم اللي هدخل فيه .

قررت اني احضر عملية لكن والله كنت سايباها لظروفها حسب ما اكون فاضية اي دكتور مش هتفرق(عقل) ويوم ما اتفقت مع زميلتي رحنا نشوف الجدول وكانت المفاجاة مستنياني ...اسمه (ياخراشي هو اللي داخل)طبعا كنت مزقططة وطايرة جوايا(عشان اغيظ انتيمتي كمان) (ايه الهبل ده انا رجعت مراهقة تاني) حضرت العملية وكانت فظيعة (عشان هو اللي عملها طبعا) طلع شاطر اوي .

وعدت الايام وهو يدخل ويشرح واحنا نتنح اكتر, ويوم ليلة الامتحان بيني وبين نفسي(ياترى همتحن عند مين) ايه ده هو انا ممكن ادخل امتحن عنده(بطلي هبل وركزي في المذاكرة).

يوم الامتحان كان موجود محطتش في دماغي كنت مركزة في المراجعة دخلنا وقالنا متخافوش وربنا معاكو.بعدها بدا الامتياز يندهو على الارقام وجه رقمي(لجنة دكتور....) لا لا لا كده كتيييير ايه الحظ ده همتحن معاه (قلبي) حمدت ربنا على الاقل عارفني وهيديني درجة حلوة سالني اسئلة حلوة وجاوبت معاه كويس ماعدا حاجة معرفتهاش قالي فكري(افكر ايه يا عم انا متنحة اساسا كفاية اني بجاوب عليك) قلتله عايزة سؤال بداله عشان اقفل اللجنة ,طبعا سالني وجاوبت ,,قاللي ممتازة( ممتازة!!!!! انا؟ قاللي ممتازة) قاللي اتفضلي(ايه ده بس كده ) انا عايزة تاني ,,مفيش حاجة تتطول القعدة شوية؟ افتكرت اني ممضتش حضور العملية معاه ,قلتله ممكن حضرتك تمضيلي؟ (وكاني بمضي اتوجراف من احمد السقا)ضحك وقاللي طبعا ممكن.

خرجت من عنده وكانت اول مرة ادخل امتحان ومش عايزة اخرج .طبعا كل الي امتحن عنده خارج بيتكلم(ياه فظيع,طيب,اسئلته حلوة,صوته ,ضحكته,,,, الخ)وتاني يوم كل اللي يشوفني عملتي ايه عند ..... كان حلو صح(خلاص يا جدعان مكنش امتحان).

خلص الامتحان وساعتها عرفت ان دي اخر مرة نشوفه الا اذا ضربت معايا زي ما ضربت المرتين اللي فاتو وامتحنت عنده اخر السنة او في امتياز بقيت في نفس الوحدة(احلااااااااام).

ايه المراهقة دي انا عيلت ولا ايه ...بلاش كلام فارغ روند وخلص ..خلاص.

ملاحظة:

كتبت القصة دي يوم 1/6

من كم يوم ظهرت نتيجة الامتحان ده لقيت الدكتور نقصني درجة !!! (خسارة فيك للي كتبته)

في الدمرداش

زي كل يوم وانا في طريقي ل (الروند) لازم اعدي واخد ال (اصطباحة) قدام مكان استلام الوفيات,,ستات لابسين اسود ,فارشين على رصيف المستشفى صويت وصريخ(عالصبح كده) اتعودت عالمنظر ده انه يكون اول حاجة اتصبح بيها في يومي ,ده غير العيانين اللي رايحين وجايين في الشارع اطفال وشباب وعواجيز (البلد كلها عيانة ولا ايه) ماعلينا وصلت البوابة ولازم زي كل يوم استنى شوية عشان اعرف ادخل على ما تخلص الخناقات بين الامن والعيانين ,كل ده عادي واتعودت عليه لكن اللي حصل بعدها اول مرة اشوفه عامل بيزق تروللي عليه (جثة) وقفت متنحة والناس وسعت الطريق ,رفعت صباعي بالشهادة,,كان اول مرة اشوف المنظر ده مسكت نفسي وكملت طريقي للروند,,طبعا متاخرة(مش كنت مستنية الخناقة تخلص) دخلت لقيت حالة (قرحة) اول مرة اشوفها(وياريتني ما شوفتها) كان راجل عجوز وحالته صعبة قربت عشان اشوف الحالة ,,كانت فظيعة(هو يوم باين من اوله)بعدها قررت ماشوفش الحالة دي تاني ,,دخل النائب بعد الشرح عشان ياخد العيان وقاله: يا حاج عايزين حد من ولادك عشان يديك دم

العيان: معنديش حد ,,النائب: فين ولادك محدش بيزورك ليه ؟,,العيان: والنبي يا دكتور خليني ساكت (وقعد يعيط) النائب:خلاص يا حاج انا اسف مش قصدي والله بس عشان نعملك العملية وكملو كلام لكني سرحت في حالة الراجل مريض ومحدش بيسال عليه(لا حول ولا قوة الا بالله)خرجت من الروند وانا لسة في الدور سمعت صوت خناقة(ايه يعني ده الطبيعي) لقيت واحدة ماسكة في خناق نائب: عملتو ايه في امي , حرام عليكو, لو مش عارفين تعالجوها قولو, امي مالها يا دكتور والنائب المسكين مش عارف يعملها ايه ويقولها ياستي هنطمنك لكن مفيش فايدة زودت في الكلام وقعدت تشده وهو بيحاول ينفد بجلده ومحدش خلصه منها غير الامن .

مشيت وانا بقول يارب اليوم ده يخلص ,جريت عشان اخرج من المستشفى قبل ما اشوف حاجة تاني(كفاية كده النهاردة) لكن هروح فين ده كل يوم بحكاية.